वीरगञ्ज । बारामा वैकल्पिक राजनीतिको बहस अब व्यवहारमा रूपान्तरण हुन थालेको देखिएको छ। लोकतान्त्रिक समाजवादी पार्टी (लोसपा)सहित विभिन्न दल र पेशागत क्षेत्रबाट आएका प्रभावशाली व्यक्तिहरु राष्ट्रिय स्वतन्त्र पार्टी (रास्वपा) मा एकैसाथ आबद्ध भएका छन्।
चितवनमा आयोजित एक कार्यक्रममा रास्वपाका सभापति रवि लामिछानेले नवप्रवेशीहरुलाई पार्टीमा स्वागत गरे। उनले देशको राजनीतिमा विश्वासको संकट गहिरिँदै गएको अवस्थामा जनताको भरोसा फिर्ता ल्याउने अभियानका रूपमा रास्वपा अघि बढिरहेको बताए। “हामी सत्ता केन्द्रित राजनीति होइन, जवाफदेही र परिणाममुखी प्रणाली निर्माण गर्न चाहन्छौं,” उनले भने।
यस अवसरमा सिमरा खानेपानीका पूर्व अध्यक्ष कासिम हुसेन, लोसपाका केन्द्रीय तथा प्रदेश तहका नेताहरु, उद्योग–व्यवसाय, बजार व्यवस्थापन र सामाजिक संघसंस्थामा सक्रिय व्यक्तित्वहरुलगायत विभिन्न पृष्ठभूमिका व्यक्तिहरु रास्वपामा जोडिएका छन्। नेपाली कांग्रेस, नेकपा एमाले र जसपासँग आबद्ध रहिसकेका नेताहरुको सहभागिताले यो प्रवेशलाई बहुपक्षीय बनाएको छ।
राजनीतिक विश्लेषकहरुका अनुसार, यस समूहगत प्रवेशले बारा क्षेत्र नम्बर ४ लाई केन्द्रमा राख्दै रास्वपाको सांगठनिक विस्तार मात्र होइन, मतदाता तहमा सोचको परिवर्तन पनि संकेत गर्छ। पार्टी प्रवेशको समन्वय बारा–४ का प्रतिनिधि सभा सदस्यका उम्मेदवार रहबर अन्सारीले गरेका हुन्।
अन्सारीले बारामा अब व्यक्तिवादी र सम्झौतामुखी राजनीतिभन्दा परिणाम खोज्ने जनमत बढ्दै गएको बताए। “यहाँका नागरिकले अब प्रश्न सोध्ने राजनीति खोजिरहेका छन्। त्यो भरोसा रास्वपाले मात्र दिन सक्छ,” उनले प्रतिक्रिया दिए।
पार्टी प्रवेश गर्ने नेताहरुले रास्वपाको स्पष्ट एजेन्डा, आन्तरिक अनुशासन र नेतृत्वप्रतिको भरोसाका कारण आफूहरु यो यात्रामा जोडिएको बताएका छन्।
यो घटनाले बारा क्षेत्र नम्बर ४ लाई आगामी निर्वाचनको केन्द्रबिन्दु बनाउने संकेत देखिएको छ भने रास्वपाको संगठनात्मक विस्तार अब अभियानको चरणबाट प्रतिस्पर्धाको चरणमा प्रवेश गरेको सन्देश पनि दिएको छ।
